“Korrupsiyaga qarshi butun jamoatchilik bilan kurashishimiz zarur”
Oʻzbekiston Respublikasi Prezidenti
Shavkat MIRZIYOYEV

Taraqqiyotning yangi bosqichida Oʻzbekiston uchun korrupsiyaning har qanday shakldagi koʻrinishi islohotlar shiddatini va samarasini susaytirishi mumkin boʻlgan illat hisoblanadi.
Darhaqiqat, Davlatimiz rahbarining 2022-yil 20-dekabrdagi Oliy Majlis va Oʻzbekiston xalqiga murojaatnomasida “Korrupsiyaga qarshi kurashishda aholining barcha qatlamlari, eng yaxshi mutaxassislar jalb qilinmas ekan, jamiyatimizning barcha aʼzolari, taʼbir joiz boʻlsa, “halollik vaksinasi” bilan emlanmas ekan, oʻz oldimizga qoʻygan yuksak marralarga erisha olmaymiz”, deb bejizga taʼkidlanmaganlar.
Shu sababli, Yangi Oʻzbekistonda “Inson qadri uchun” tamoyili asosida xalqimizning farovonligini yanada oshirish, inson huquqlari va manfaatlarini soʻzsiz taʼminlash hamda faol fuqarolik jamiyatini shakllantirishga qaratilgan islohotlar doirasida barcha sohalarda korrupsiyaga qarshi murosasiz kurashish muhitini shakllantirish talab etiladi.
Immunologiya va inson genomikasi institutida ham korrupsiyaning oldini olish choralarini koʻrish, uni keltirib chiqarishi mumkin boʻlgan sabab va shart-sharoitlarni barvaqt aniqlash va bartaraf etish boʻyicha samarali tizimni shakllantirishga qaratilgan keng koʻlamli ishlar amalga oshirilmoqda.
Jumladan, Immunologiya va inson genomikasi institutida korrupsiyaga qarshi ichki nazorat tuzilmalari tashkil etilganligi, ishga qabul qilishni ochiq tanlov asosida amalga oshirish, normativ-huquqiy hujjatlar loyihalarini korrupsiyaga qarshi ekspertizadan oʻtkazish, xaridlarni amalga oshirishda korrupsiyaviy xatarlarni aniqlash va bartaraf etish amaliyotlari joriy qilinganligi, institut huzuridagi Ilmiy kengashning seminar va himoyalari ochiq portallarda namoyish etilishi, kuzatish uchun offlayn va onlayn qatnashish imkoniyatlari yaratilganligi kabi qator amaliy ishlarni keltirib oʻtish mumkin.
Immunologiya va inson genomikasi institutida korrupsiyaning oldini olish choralarini koʻrish, uni keltirib chiqarishi mumkin boʻlgan sabab va shart-sharoitlarni barvaqt aniqlash va bartaraf etish hamda korrupsiyaga qarshi murosasiz muhitni shakllantirish borasidagi ishlar kelgusida ham izchillik bilan davom ettiriladi.
Immunologiya va inson genomikasi instituti korrupsiyaga qarshi kurashish va korrupsiyaviy holatlarning barvaqt oldini olish boʻyicha ishlarni samarali tashkil etishda fuqarolarimizning faolligini va tashabbuslarini qoʼllab-quvvatlaydi.
Immunologiya va inson genomikasi instituti rahbariyati, laboratoriya va filiallari hamda xodimlarining qonunchilikka zid xatti-harakatlari yoki harakatsizliklarining guvohi boʻlsangiz yoki xodimlarning korrupsiya va boshqa huquqbuzarlik holatlariga aloqadorligi yuzasidan maʼlumotlarga ega boʻlsangiz, institutning (71) 207-06-93 raqamli Ishonch telefoni yoki rasmiy veb-sayt orqali oʻz murojaatingizni yoʻllashingiz mumkin.
Murojaatingiz qonunchilikda belgilangan tartib va muddatlarda koʻrib chiqiladi hamda tasdiqlangan korrupsion holatlar boʻyicha keskin qonuniy choralar koʻriladi.
Oʼz navbatida, Immunologiya va inson genomikasi institutida mehnat qilayotgan xodimni korrupsiya holatlarining har qanday koʻrinishlariga nisbatan murosasiz munosabatda boʻlishga hamda oʻz xizmat vazifalarini halol va xolis bajarishga yana bir bor chaqiraman.