Oʻzbekiston Respublikasi Fanlar akademiyasi Immunologiya va inson genomikasi institutida “Tibbiyotda genomik texnologiyalar-fuqarolik jamiyati va turli e’tiqodlarning oʻzaro ta’siri: axloqiy va huquqiy muammolar” mavzusida tashkil etilgan davra suhbatida xalqaro miqyosdagi olimlar, huquqshunoslar, Din ishlari bo‘yicha qo‘mita vakillari, jurnalistlar ishtirok etdi. Butun insoniyatni qiynayotgan irsiy kasalliklar, O‘zbekistonda bugun bu boradagi muammolar, raqamlar aniq ko‘rsatgichlarda keltirib o‘tildi. Yaqin qarindoshlarning, erta turmushning ayanchli oqibatlari tilga olindi.

Davra suhbatida Immunologiya va inson genomikasi instituti ilmiy xodimi, olima Tatyana Xegay tomonidan orfan kasalliklari, ularning oqibatlari, bizdagi og‘riqli masalalar aniq faktlar bilan taqdimot qilib berildi. Ishtirokchilar Anhor.uz tahliliy sayti bosh muharriri Lola Islomova, huquqshunos Azamat Egamberdiev, Sog‘liqni saqlash vazirligi vakili Saida’lo Usmonov, Din ishlari qo‘mitasi vakili Muhammadbobur Yo‘ldoshev, OAV vakillari millatning dardi bo‘lgan bu irsiy kasalliklar sabablari va oqibatlarini keng jamoatchilikka yetkazish xususida so‘z yuritishdi. Davra suhbati yakunida joriy yilning 30-31-oktabr kunlari orfan kasalliklarini tashxislash va davolashga bag‘ishlangan “Chegarasiz hamdo‘stlik” xalqaro forumi bo‘lib o‘tish haqida ma’lumot berildi.