Institut oʻz faoliyatini 1985 yilda akademik Aripov U.A., akademik Petrov R.V. va akademik Xaitov R.M tashabbuslari bilan SSSR Sogʻliqni saqlash vazirligi Immunologiya instituti filiali sifatida boshlagan. Institut yillar davomida oʻzining rasmiy nomlarini oʻzgartirdi: Oʻzbekiston Respublikasi Fanlar akademiyasi Immunologiya instituti; O‘zbekiston Respublikasi Sog‘liqni saqlash vazirligi Respublika immunologiya ilmiy markazi. O‘zbekiston Respublikasi Prezidentining 2018-yil 05-iyuldagi “ Immunologiya va inson genomikasi sohasida fundamental va amaliy tadqiqotlar hamda innovatsion ishlarni rivojlantirish bo‘yicha qo‘shimcha chora-tadbirlar to‘g‘risida”gi PQ-3838-son qaroriga muvofiq Respublika immunologiya ilmiy markazi Immunologiya va Inson genomikasi instituti etib qayta tashkil qilindi va O‘zbekiston Respublikasi Fanlar akademiyasi tasarrufiga o‘tkazildi.

Qarorda Institutning asosiy vazifalari va faoliyatining ustuvor yo‘nalishlari etib quyidagilar belgilab qo‘yilgan:

• biotibbiyotning umumjahon yutuqlari bilan o‘zaro bog‘liq immunogenom texnologiyalarning keng spektri ishlab chiqilishini ta’minlovchi kompleks tadqiqotlarni amalga oshirish;
• onkologik, autoimmun va metobolik patologiyalarda autoimmun-yallig‘lanish jarayonlarini shakllantirishning tizimli immunologik, genomik va xujayra-molekulyar mexanizmlarining umumiyligi va farqlari to‘g‘risida yangi tasavvurlarni o‘rganish va ta’riflash;
• mahalliy xomashyodan tayyorlangan immunotrop dori vositalarini o‘rganish maqsadida yangi farmatsevtika texnologiyalarini ishlab chiqish uchun tizimli immunologiya va genomikaning yutuqlaridan foydalanish;
• xalqaro talablarga muvofiq multiomilli (birikmali) kasalliklarni diagnostika qilish va davolash uchun yangi immunobiogenetik, import o‘rnini bosuvchi mahsulotlar ishlab chiqishda tahliliy va texnologik asoslarni yaratish;
• immunologiya, tibbiy genetika sohasida va ular bilan bog‘liq yo‘nalishlarda yuqori malakali yosh mutaxassislar va oliy malakali ilmiy-pedagog kadrlar tayyorlash maqsadida fan va ta’limni integratsiyalash shakllarini takomillashtirish;
• innovatsion ilmiy tadqiqotlarni rivojlantiradigan yangi dastur va uslublarni ishlab chiqish, o‘quv jarayonini uslubiy ta’minlash, shuningdek, Institut ilmiy xodimlarining sohadagi oliy ta’lim muassasalarining ta’lim jarayonida faol ishtirok etishini ta’minlash.